Numri i viktimave të tragjedisë së Koçanit ka arritur në 60.
Sot ka ndërruar jetë edhe Aleksandar Karadakovski, 29 vjeç, një nga katër pacientët që ishin në gjendje kritike për jetën. Ai ishte trajtuar në Lituani, por nuk i mbijetoi dot plagëve të marra nga zjarri.
Drejtori i spitalit “Shën Naum Ohërski”, Nebojsha Nastov, tha se Karadakovski, menaxheri i diskotekës ku ndodhi tragjedia, kishte pësuar djegie të rënda në kokë, qafë dhe gjymtyrë.
Lajmin për vdekjen e tij e bëri të ditur ministri i Shëndetësisë, Arben Taravari.
“Bëhet fjalë për Aleksandar Karadakovskin, i cili është 29 vjeç dhe është trajtuar në Lituani. Dëshiroj t’i shpreh ngushëllimet e mia të sinqerta familjes së tij. Lajmi pozitiv është se nga 98 pacientët që janë duke u trajtuar, tani kanë mbetur vetëm 78, të cilët po trajtohen këtu në Shkup dhe jashtë vendit. 14 pacientë janë shëruar sot në Shkup, ndërsa 14 të tjerë janë në gjendje të mirë. Aktualisht në Shkup po trajtohen 9 pacientë,” tha Taravari.
Karadakovski ishte menaxher i diskotekës “Pulse”, ku ndodhi zjarri.
“Meqenëse viktima e 60-të e sotme është një person i cili kishte qenë i përfshirë më herët në një procedurë hetimore, si menaxher i subjektit juridik, Prokuroria Themelore Publike Koçan do të lëshojë urdhëresën për ndërprerjen e hetimeve ndaj tij, pasi të pranohet dokumentacioni zyrtar për shkakun e vdekjes,” njoftoi Prokuroria e Koçanit.
Pas vdekjes së Karadakovskit, Taravari njoftoi se tre pacientë të tjerë që po trajtohen jashtë vendit ndodhen gjithashtu në gjendje të rëndë, por nuk dha më shumë detaje mbi situatën e tyre.
