Administrata Trump vazhdoi me shitjen e më shumë se 20,000 pushkëve automatike të prodhimit amerikan në Izrael muajin e kaluar, sipas një dokumenti të marrë nga Reuters, duke avancuar një shitje që administrata e ish-presidentit Joe Biden kishte vonuar pas shqetësimeve se ato mund të përdoreshin nga kolonët ekstremistë izraelitë.
Departamenti i Shtetit i dërgoi një njoftim Kongresit më 6 mars për shitjen prej 24 milionë dollarësh të pushkëve të sulmit Colt Carbine, duke treguar se përdoruesi përfundimtar do të ishte policia izraelite, sipas dokumentit.
Shitja e pushkëve është një transaksion i vogël në krahasim me miliarda dollarët e armëve që Uashingtoni i furnizon Izraelit.
Por tërhoqi vëmendjen kur administrata Biden e vonoi blerjen duke përmendur shqetësimet se armët mund të përfundonin në duart e kolonëve izraelitë, disa prej të cilëve kanë sulmuar palestinezët në Bregun Perëndimor të pushtuar nga Izraeli.
Administrata Biden ka vendosur sanksione ndaj individëve dhe subjekteve të akuzuar për kryerjen e dhunës në Bregun Perëndimor, i cili ka parë një rritje të sulmeve të kolonëve kundër palestinezëve.
Në ditën e tij të parë në Shtëpinë e Bardhë, më 20 janar, Donald Trump lëshoi një urdhër ekzekutiv për heqjen e sanksioneve kundër kolonëve në një ndryshim të politikës amerikane.
Që atëherë, administrata e tij ka miratuar shitjen e armëve në vlerë prej miliona dollarësh Izraelit.
Në konferencën e mbajtur në Kongres më 6 mars thuhet se qeveria amerikane ka marrë parasysh parametrat “politik, ushtarak, ekonomik, të drejtat e njeriut dhe kontrollin e armëve”.
Departamenti i Shtetit nuk u përgjigj kur u pyet nëse qeveria amerikane kishte kërkuar garanci nga Izraeli për përdorimin e armëve.
Lidhje të ngushta
Donald Trump ka krijuar lidhje të ngushta me kryeministrin izraelit Benjamin Netanyahu, duke u zotuar të mbështesë Izraelin në luftën e tij kundër Hamasit në Rripin e Gazës. Administrata e tij në disa raste ka ecur përpara me shitjet e armëve në Izrael, pavarësisht kërkesave nga ligjvënësit demokratë për të ngrirë shitjet derisa të marrin më shumë informacion.
