Shqiptarët renditen të tretët për nga numri i shtetasve të kthyer në vendin e origjinës nga një shtet i Bashkimit Europian gjatë tremujorit të katërt të vitit 2024, me 1,980 persona të riatdhesuar. Sidoqoftë, të dhënat e EUROSTAT tregojnë se ky numër ka pësuar një ulje prej 0.9% krahasuar me të njëjtën periudhë të vitit 2023. Gjeorgjianët dhe turqit janë në krye të listës.
Në total, rreth 125 mijë shtetas të huaj janë urdhëruar të largohen nga një vend i BE-së deri në fund të vitit 2024, me 29 mijë prej tyre që janë realisht riatdhesuar në vendet e origjinës. Kjo tregon një rritje prej 24.3% të riatdhesimeve krahasuar me fundvitin 2023. Franca është vendi me më shumë urdhra largimi, e ndjekur nga Spanja, Gjermania, Greqia dhe Italia.
Sipas origjinës, algjerianët, sirianët dhe marokenët përbëjnë shumicën e atyre që janë urdhëruar të largohen nga BE. Përsa i përket riatdhesimeve, Gjermania, Franca dhe Suedia janë vendet që kanë kthyer më shumë persona në vendet e treta.
Të dhënat e EUROSTAT gjithashtu tregojnë se, ndërsa riatdhesimet janë rritur për disa shtetësi si marokenët, turqit, moldavët dhe gjeorgjianët, për shqiptarët ka pasur një rënie të lehtë.
