Gjykata e Posaçme e Shkallës së Parë për Krime të Rënda ka dhënë dënimin duke e lënë ne burg Edison Muçeku, i cili u ekstradua nga Britania e Madhe për në Shqipëri.
33-vjeçari është i akuzuar për veprën penale ’’Sigurimi i kushteve për të kryer vrasje’’, hetim nga SPAK.
Sipas dokumenteve të gjykatës së City of Westminster, Muceku akuzohet si bashkëautor në një sulm të armatosur kundër Hamza Terziut, ngjarje e ndodhur më 21 maj 2020 në Bulqizë. Viktima shpëtoi, por mbeti i plagosur nga të shtënat.
Muçeku, i konsideruar si pjesë e një grupi kriminal të drejtuar nga Hektor Xheçuka, ka kërkuar që procesi i ekstradimit të ndalet, duke shprehur dëshirën për t’u kthyer në Shqipëri dhe për t’u përballur me akuzat.
Hetimet zbulojnë se grupi i Xheçukës, i njohur për aktivitete kriminale, përfshirë vrasjet me pagesë, është i lidhur me emra të tjerë të njohur të botës së krimit në Shqipëri. Prokuroria e Posaçme ka lëshuar urdhër-arreste për disa anëtarë të këtij grupi pas publikimit të bisedave të koduara në aplikacionin SkyECC.
Sipas dosjes hetimore, Hektor Xheçuka, i cili dyshohet të jetë strehuar në Dubai, ka drejtuar sulmin ndaj banesës së Hamza Terziut si një paralajmërim për konfliktet mes grupeve. Në operacionin “Revanshi”, SPAK ka identifikuar të përfshirë edhe emra të tjerë si Albert Zaja, Florenc Kelmendi dhe Ardit Gjokrosa.
Një nga episodet e zbuluara përfshin planifikimin e një sulmi ndaj banesës së Terziut, të ndihmuar nga informacione të siguruara nga familja Gjokrosa. Për këtë rast janë lëshuar disa urdhër-arreste nga Gjykata e Posaçme Kundër Korrupsionit dhe Krimit të Organizuar.
