Katër persona janë nxjerrë nga rrënojat pas gati 60 orësh nga tërmeti i fuqishëm me magnitudë 7.7 që goditi Minamarin të premten, duke shkaktuar të paktën 1,700 viktima në vendin e Azisë Juglindore.
Të mbijetuarit u shpëtuan nga rrënojat e një shkolle të shembur në rajonin verior të Sagaing, ku ekipet e shpëtimit gjetën edhe një trup të pajetë, sipas shërbimit zjarrfikës të Minamarit.
Qindra persona mbeten të zhdukur, ndërsa përpjekjet e dëshpëruara të kërkimit dhe shpëtimit vazhdojnë si në Mianmar ashtu edhe në Tajlandën fqinje. Numri i viktimave në kryeqytetin tajlandez, Bangkok, është rritur në 18, ndërsa 76 punëtorë janë ende të zhdukur pas shembjes së një ndërtese shumëkatëshe në ndërtim e sipër.
Megjithëse operacionet e shpëtimit kanë nisur që nga e premtja dhe ndihmat ndërkombëtare po fillojnë të mbërrijnë në Minmar, ekipet e emergjencës po përballen me vonesa në arritjen e zonave më të prekura, duke i lënë banorët vendas të përpiqen të nxjerrin të mbijetuarit me duar.
Organizata Botërore e Shëndetësisë ka paralajmëruar se spitalet janë të mbingarkuara me të plagosur, ndërsa një zëdhënës i Programit Botëror të Ushqimit është shprehur se mijëra persona të zhvendosur janë pa ushqim, strehim dhe ilaçe.
