Shqipëria përmbylli me sukses vlerësimin e GRECO-s për angazhimin intensiv në parandalimin e korrupsionit në qeverisjen qendrore dhe forcat e sigurisë.
Përmbushja e rekomandimeve të KiE-së është rezultati faktik i gjithë përpjekjeve, për të forcuar çdo hallkë integriteti në Policinë e Shtetit, agjencinë më të madhe ligjzbatuese në vend.
Kryeministri Edi Rama, i cili shoqërohej nga ministrja e Shtetit për Administratën Publike dhe Antikorrupsionin, Adea Pirdeni dhe ministri i Brenshëm Ervin Hoxha, tha se sipas vlerësimit, Shqipëria konsiderohet lider rajonal në politikat kundër korrupsionit.
Rama: Rëndom qeveritë maten me atë që bëjnë, por meritën kryesore e kanë për atë që nuk lejojnë të ndodhë. Ajo që qeveria nuk lejon të ndodhë, mund të vlerësohet vetëm duke hyrë më thellë dhe duke sonduar, themelet në të gjitha fushat. Sot më vjen mirë që jemi për këtë raport domethënës dhe inkurajues për progresin që kemi bërë, një tjetër kala që marrim. Kur kemi nisur këtë rrugëtim raportet ishin problematike dhe ky raport vjen pas atij të Sigmës, pak kohë më parë që na dha shumë energji pozitive dhe shumë arsye, për t’u ndjerë edhe më të motivuar, duke e renditur Shqipërinë të parën për integritetin e prokurimeve publike, të parën në rajon për menanxhimin financimeve publike dhe administrimin e burimeve njerëzore me diferencë nga vendi i dytë.
Një tjetër raport domethënës na dha energji, ishte ai i një ndër indekseve më të respektuara, ku shkruhet që nga vendi më i korruptuar në Europë në 2012 sot renditet si nga 8 shtetet me progresin më substancial të dekadës së fundit. Shqipëria ka performuar më mirë në të gjithë treguesit, krahasuar me të gjitha matjet e bëra më parë. Përmirësimi i shpejtë në cilësinë e qeverisjes, e renditur në 3 vendet me përmirësimin më të madh.
Shqipëria konsiderohet lider rajonal në politikat kundër korrupsionit, me rezultatet me të lartë në ekonominë e Ballkanit për masën e politikave antikrrupsion, duke tejkaluar ndjeshëm rajonin në fushat e parandalimit të korrupsionit, si edhe në fushën e hetimeve dhe ndjekjeve penale, përpjekje për të parandaluar dhe luftuar korrupsionin, sipas raport, falë një kuadri gjithëpërfshirës ligjor dhe institucional. Kjo është një tërësi faktesh që shpjegon se përse Shqipëria sot është në pararojë të procesit të integrimit të Ballkanit Perëndimor në BE, pse Shqipëria sot ka mundësi për të përmbyllur negociatat brenda 2027. Do vazhdojmë me hapjet e kapitujve të tjerë, ndryshe nga çfarë është thënë ditën e fundit në pasqyrat e kënetës politike dhe mediatike.
