I quajtur dikur si peshku më i shëmtuar në botë për shkak të pamjes së tij, peshku qullës tashmë është kurorëzuar si Peshku i Vitit nga një grup ambientalistësh në Zelandën e Re.
Konkursi vjetor i organizuar nga Trusti i Ruajtjes nga Mali në Det synon të ndërgjegjësojë për gjallesat ujore të vendit. Këtë vit, peshku qullës mori çmimin e madh përmes më shumë se 1300 votave nga 5500 votues, raporton BBC.
Kjo shënon një fitore për këtë peshk që në vitin 2013 u shpall si maskota e Shoqërisë së Ruajtjes së Kafshëve të Shëmtuara.
Peshku xhelatinoz jeton në shtratin e detit dhe arrin deri në 30 centimetra gjatësi. Zakonisht gjendet në brigjet e Australisë dhe Tasmanisë, në thellësitë 600-1200 metra. Ai ushqehet me molusqe, karavidhe, gaforre dhe iriqë deti.
Peshku qullës njihet për pamjen e tij si të shformuar, por në thellësi duket si një peshk normal pasi presioni i lartë i ujit ‘mbledh’ skeletin e tij.
Por kur kapet dhe nxirret me shpejtësi në sipërfaqe, trupi i tij merr trajtën xhelatinoze prej të cilit njihet si një prej gjallesave më të shëmtuara të botës.
Në vendin e dytë të konkursit u shpall një peshk portokalli i thellësive që njihet për kanalet e mukozës në kokë.
