U prezantuan në njësinë 7 në Tiranë, kandidatët e Partisë Demokratike dhe Koalicionit për ‘Shqipërinë Madheshtore’, Grigels Muçollari dhe Xhulia Xheka.
Në takimin me strukturat demokrate ishte Edi Paloka, Kryetar i Këshillit Kombëtar të PD.
Paloka veçoi cilësitë e kandidatëve dhe u ndal në situatën politike.
“Gjithçka ka ndryshuar në favorin tonë. Deri dje, Edi Rama futej në fushë dhe kishte dhe arbitrin me vete. Ata zhvleresonin çdo gjë që bente PD dhe mbyllnin sytë për shkeljet e poshtërsitë që bente ai, dhe në fund e shpallnin fitues. Kjo nuk është më”, tha Paloka i cili shtoi se Opozites do t’i mjaftonte dhe një arbitër neutral për të fituar.
Grigels Muçollari, kandidat për deputet në listat e hapura të Tiranës, vjen pas një mbështetje të madhe që mori në Primare.
Ai falënderoi demokratët për përkrahjen dhe u shpreh se: “Ne jemi në një betejë, në një projekt e vizion që është më i madh se ne. Nuk jemi për interesa vetjake këtu. Shqipëria Madhështore është e mundur, nuk është Utopi.
Është e mundur që pensionistët të kenë e të jetojnë me dinjitet, është e mundur që të rinjtë të ndërtojnë të ardhmen këtu, është e mundur të kemi një shtresë të mesme, është e mundur që ekonomia të lulëzojë. Ne do ta bëjmë këtë të mundur, të gjithë bashkë”.
