Kryeministri Edi Rama ka ironizuar deputetin e Partisë Demokratike Dashnor Sulën, i cili mbeti pa parti për të kandiduar në parlamentaret e 11 majit.
Rama e ka krahasuar me kalanë e Rozafës, që sipas legjendës ndërtohej ditën e shembej natën. E njëjtë për Ramën është dhe fati i Dash Sulës në Partinë Demokratike, teksa shprehet se deputeti punoi fort për partinë në Peqin, ndërsa në të gdhirë ai nuk kishte më një parti.
Edi Rama: Nuk është rastësi që kalaja e Rozafës është legjendë shqiptare, ndërto ditën e prish natën. Ndërto Dash Sula gjithë atë parti në Peqin dhe ia prishën natën, u gdhi në mëngjes dhe ia kishin marrë partinë, ia morën natën partinë Dash Sulës.
Gjithë ajo parti atje, nuk dihet se kush do ti hajë ato kokrra gruri se gjeli detit mbeti pa parti. Gjel deti e kam kompliment se është në fushë të thatë, se të tjerët janë lluc. Mund të thuash çfarë të duash për atë, po ato që i ka, i ka.
Dashnor Sula kryesoi listës e qarkut të Elbasanit me votat e Primareve ndërsa në momentin që Partia Demokratike hartoi listat përfundimtare për zgjedhjet e 11 majit, ai nuk ishte përfshirë në listat e mbyllura të kësaj partie.
Deputeti hoqi menjëherë dorë nga PD dhe Sali Berisha dhe deklaroi menjëherë se ishte futur në negociata me koalicionin Lapaj-Shabani, që gjithashtu rezultuan pa sukses pasi as në këtë parti ai nuk e mori një vend të sigurtë për në qarkun e Elbasanit.
