Naureda Llagami, ish-kryetarja e Këshillit të Lartë Gjyqësor (KLGJ), ka reaguar publikisht ndaj disa artikujve të publikuar së fundmi që synojnë të dëmtojnë figurën dhe imazhin e saj.
Në një deklaratë drejtuar publikut, miqve, kolegëve dhe përfaqësuesve të medias, Llagami ka sqaruar se komunikimet e pretenduara me znj. Bushka, të publikuara në media, janë të pavërteta dhe të fabrikuara.
Sipas Llagamit, këto komunikime elektronike nuk kanë ndodhur kurrë dhe janë prodhime të fabrikuara që lehtësisht mund të verifikohen.
Ajo thekson se këto mesazhe janë shpërndarë në mënyrë anonime në media të ndryshme nga një person i cili prej një viti e ka përndjekur në platformat sociale “LinkedIn” dhe “Facebook”, duke postuar materiale që cënojnë rëndë reputacionin e saj.
Llagami ka bërë të ditur se i njëjti person ka fabrikuar komunikime imagjinare për ndikime në sistemin gjyqësor, për të cilat tashmë është proceduar penalisht për “kallëzim të rremë” dhe “falsifikim të dokumenteve”.
Për më tepër, personi në fjalë është pezulluar nga Këshilli i Lartë Gjyqësor gjatë kohës kur Llagami drejtonte institucionin.
Duke reflektuar mbi periudhën pesëvjeçare të drejtimit të KLGJ, Llagami thekson se ka punuar me përkushtim dhe profesionalizëm për të krijuar një model të ri të qeverisjes së sistemit gjyqësor.
Ajo shpreh bindjen se ky model është ndërtuar mbi baza të forta dhe parime të larta etike.
Në përfundim të deklaratës së saj, Naureda Llagami nënvizon vendosmërinë për të ndjekur rrugën ligjore për të mbrojtur figurën dhe integritetin e saj.
