Kreu i Partisë Demokratike Sali Berisha gjatë vizitës në Elbasan për Ditën e Verës ka zhvilluar edhe një takim me kandidatët demokratë për deputet në këtë qark. Gjatë fjalës së tij Berisha u shpreh se duhet të përqendrohen me të gjithë kohën tonë, me qytetarët tek shpjegimi dhe tek programi. Lideri i opozitës gjithashtu theksoi se kanë një program që vërtet e transformon Shqipërinë. Ndër të tjera Berisha tha se me ardhjen e PD në pushtet do të ulin taksën e naftës dhe do e sjellin naftën në çmimet që e shet Kosova.
“Në tërësi, klima është shumë pozitive. Siç keni parë ju, listat janë mirëpritur gjerësisht. Por një gjë është e sigurt, që nuk kanë asnjë krahasim me listat e palës tjetër. Edi Rama ka sot dhjetëra prej tyre me dosje të rënda vjedhjesh, hajnish, përvetësim pronash. Ja ku jemi ne, opozitarë 12 vite. Montuan procese politike dhe nxorën se janë persekutorë politikë. Ky është një avantazh shumë i madh për kandidatët e opozitës. Ne kemi të metat tona, por ne nuk kemi mëkatet e tyre. Ne kemi qëndruar 12 vite në opozitë dhe dalim sot para shqiptarëve të betuar që do punojmë për ta. Të betuar që do ndryshojmë jetën e tyre në qytet, fshat dhe kudo.
Ne kemi një program që vërtet e transformon Shqipërinë. Çfarë do t’u sugjeroja një gjë të dytë ju? Çdo fjali, çdo fjalë, çdo bisedë, ju do shpalosni programin e PD. Kurrë mos u lodhni me këtë. Ju do i thoni çdo qytetari që ne do vendosim minimumin jetik 200 euro. Me 200 euro, varfëria ekstreme nuk ekziston. Dhe po të merrni vendet e BE, ato nuk kanë varfëri ekstreme. Sepse këto japin pikërisht këtë. Ne po e përgatisnim që në vitin 2013, por ne e humbëm pushtetin. Gjetëm 15 mijë familje në varfëri ekstreme dhe do u jepnim atyre minimumin e tyre që u duhej për të mos qenë në varfëri ekstreme.
