Zyrtarët rusë u kanë komunikuar homologëve të tyre në Shtetet e Bashkuara se nuk duan që i dërguari Rusi-Ukrainë, Keith Kellogg të përfshihet në diskutimet e nivelit të lartë që synojnë përfundimin e luftës në Ukrainë, shkruan Reuters.
Kellogg ka munguar personalisht në disa diskutime të nivelit të lartë javët e fundit, duke përfshirë takimin e fundit në Arabinë Saudite. Gjithashtu ai mungoi në një takim të nivelit të lartë me rusët në Arabinë Saudite në shkurt. Megjithatë nuk e qartë nëse mungesa e Kellogg ishte e lidhur me kërkesën e zyrtarëve rusë dhe nuk ishte e qartë se kur ishte bërë kërkesa.
Zyrtari amerikan tha se kërkesa nuk ishte marrë parasysh, duke përmendur faktin se Kellogg dërgoi një anëtar të rangut të lartë të stafit të tij, Eli Rosner, për të marrë pjesë në takimin e fundit saudit. Ambasada ruse në Uashington nuk iu përgjigj menjëherë një kërkese për koment. Zëdhënësi i Këshillit të Sigurisë Kombëtare, James Hewitt, tha se Kellogg po luante një rol vendimtar në përfundimin e luftës në Ukrainë.
“Presidenti Trump ka përdorur talentin e shumë zyrtarëve të lartë të administratës për të ndihmuar në sjelljen e luftës në Ukrainë në një zgjidhje paqësore”, tha Hewitt të enjten në mbrëmje.
SHBA dhe Ukraina ranë dakord për një armëpushim 30-ditor në parim gjatë takimit të tyre në Arabinë Saudite në fillim të javës. Por presidenti rus Vladimir Putin sugjeroi të enjten se oferta e armëpushimit ka nevojë për ripunim serioz.
