Presidenti amerikan Donald Trump ka reaguar për herë të parë pasi Putini deklaroi se ishte dakord për një armëpushim 30-ditor me Ukrainën.
Gjatë një takimi me kreun e NATO-s në Zyrën Ovale në Shtëpinë e Bardhë, Trump tha se Putin bëri një deklaratë shumë premtuese, por që sipas tij, nuk ishte e plotë.
Reuters raporton se Trump tha se Putini “bëri një deklaratë shumë premtuese, por nuk ishte e plotë” dhe se ai ishte i gatshëm të bisedonte me presidentin rus për të siguruar një armëpushim.
“Shpresojmë se Rusia do të bëjë gjënë e duhur,” citohet të ketë thënë ai.
Ndërkohë Vladimir Putin është shprehur së është në favor të arritjes së një armëpushimi si dhe paqeje të përhershme me kushtin që të adresohen të gjitha problemet mes dy kombeve.
Në një konferencë për shtyp nga Moska, i pari i Kremlinit ka thënë se është pro armëpushimit.
“Ne jemi pro armëpushimit”, tha Putin, ndërsa shtoi se ky hap duhet të çojë në një “paqe të qëndrueshme”.
“Ne pajtohemi me propozimin për ndërprerjen e armiqësive, por ai duhet të çojë në paqe të qëndrueshme dhe të heqë shkaqet themelore të kësaj krize,” theksoi presidenti rus.
