Paul Pogba ka të ngjarë të largohet nga Juventusi si lojtar i lirë pasi drejtori Cristiano Giuntoli konfirmoi se ata kanë investuar në lojtarë të tjerë.
Mesfushori francez pas uljes së dënimit të tij për doping nga 4 vjet në 18 muaj, pritet të kthehet në fushë në mars 2025. Pogba dëshiron të rifillojë karrierën e tij me Juventusin dhe është madje i gatshëm të pranojë një ulje page për t’u rikthyer në grup.
Edhe pse Pogba ka një kontratë me gjigantët e Serie A deri në qershor 2026, Giuntoli e bëri të qartë se klubi është i përgatitur të vazhdojë pa të.
“Pozicioni ynë është i qartë. Pogba ka qenë një lojtar i madh, ai ka qenë jashtë për një kohë të gjatë dhe vitin e kaluar ne u detyruam të investonim në lojtarë të tjerë,” tha Giuntoli për DAZN përpara ndeshjes së klubit në shtëpi kundër Lazios. “Pra tani skuadra është e kompletuar ashtu siç është.”
Kishte raportime që pretendonin se Juventus po kërkonte një rrugë miqësore të largimit për Pogba dhe konfirmimi i Giuntoli ka vulosur fatin e mesfushorit. Megjithatë, duke pasur parasysh cilësinë e tij, ylli francez nuk do ketë vështirësi për të gjetur një skuadër.
Juventusi mbetet i pamposhtur në Serie A dhe u ngjit në vendin e dytë në renditje pasi arriti një fitore të ngushtë 1-0 ndaj Lazios të shtunën në mbrëmje. Ata do të kthehen në aksion të martën në Ligën e Kampionëve kur do të përballen me VFB Stuttgart në shtëpi.
