Dehidratimi, gulçimi, ethet e larta dhe dhimbjet ekstreme të trupit po i dërgojnë njerëzit në spital në rastet më të rënda të gripit, thonë mjekët. Disa kanë raportuar simptoma jashtëzakonisht të rënda, edhe pse janë vaksinuar.
Temperaturë e lartë, djersitje, kollë, dhimbje të fytit dhe lodhje dërrmuese. Këto simptoma intensive janë shenja dalluese se si gripi mund të shkaktojë inflamacion të përhapur, duke e vënë të gjithë trupin në një gjendje stresi.
Ethet vazhdojnë për disa ditë, si dhe shenjat e dehidrimit të rëndë, gjithashtu kërkojnë kujdes mjekësor.
“Nëse keni vështirësi në frymëmarrje, ky do të ishte një tregues për të kërkuar kujdes urgjent,” apelojnë mjekët.
A është tepër vonë për të marrë vaksinën kundër gripit?
Çdo person i moshës 6 muajsh e lart mund të vaksinohet ende. Ndërsa zakonisht duhen dy javë pas vaksinimit për të ndërtuar imunitet të fortë, sezoni i gripit mund të zgjasë deri në pranverë. Edhe nëse kemi arritur kulmin, kemi ende gjysmën e sezonit përpara.
Ndërsa vaksina nuk parandalon domosdoshmërisht një person që të infektohet me grip, ekspertët thonë se ajo mund të zvogëlojë ashpërsinë dhe kohëzgjatjen e sëmundjes.
Ndërsa gripi është përhapur me shpejtësi gjatë javëve të fundit, sipas epidemiologëve shifrat janë përgjithësisht në përputhje me sezonet e mëparshme tipike të gripit.
Fakte të vaksinës kundër gripit
- Vaksina e gripit është mënyra e parë dhe më e mirë për të reduktuar shanset për t’u prekur nga gripi dhe për ta përhapur atë te të tjerët. Qendrat për Kontrollin dhe Parandalimin e Sëmundjeve rekomandojnë një vaksinë vjetore kundër gripit për të gjithë ata mbi 6 muajsh që nuk kanë një gjendje të ndërlikuar, siç është një reaksion alergjik i mëparshëm ndaj vaksinës së gripit.
- Një vaksinë kundër gripit është veçanërisht e rëndësishme për njerëzit që mund të jenë në rrezik më të lartë për komplikime serioze. Këtu përfshihen foshnjat dhe fëmijët e vegjël, gratë shtatzëna, njerëzit me sëmundje kronike shëndetësore dhe njerëzit 65 vjeç e lart.
- Vaksina kundër gripit është e sigurt për gratë shtatzëna dhe ato që ushqejnë fëmijën me gji, të cilat mund të kalojnë antitrupa tek foshnjat e tyre që do t’i ndihmojnë në mbrojtjen e tyre.
- Vaksina e gripit nuk mund të shkaktojë grip. Vaksinat ose përmbajnë virus të inaktivizuar, që do të thotë se viruset nuk janë më infektive, ose një grimcë e krijuar për t’u dukur si një virus gripi për sistemin tuaj imunitar.
- Si çdo produkt mjekësor, vaksinat mund të shkaktojnë efekte anësore. Efektet anësore të vaksinës së gripit janë përgjithësisht të lehta dhe largohen vetë brenda pak ditësh.
- Vaksina kundër gripit fillon të ofrojë mbrojtje të pjesshme menjëherë, por duhen rreth dy javë për të ofruar mbrojtje të plotë./shendeti
