Presidenti serb, Aleksandër Vuçiç, ka komentuar trazirat që shpërthyen gjatë seancës së Kuvendit të Serbisë, ku u përplasën opozita dhe qeveria, dhe ku u hodhën flakadanë, gaz lotsjellës, vezë, dhe objekte të tjera.
Vuçiç e ka cilësuar këtë ditë si një moment të vështirë për Serbinë dhe për secilin qytetar të vendit, duke theksuar se për këtë ngjarje kërkohet përgjegjësi ligjore. Ai ka theksuar se ajo që ndodhi ishte një akt bullizmi dhe sjellje huligane, duke kërkuar ndjekje penale dhe ligjore.
“Sot është një ditë e vështirë për Serbinë, për çdo qytetar të këtij vendi. Jemi dëshmitarë të diçkaje që nuk e kemi parë që nga krijimi i sistemit partiak, që do të thotë që nga 35 vitet e fundit. Kjo nuk ka ndodhur në sistemin shumëpartiak. Kërkoj përgjegjësi penale dhe ligjore, dhe presim që prokuroria të veprojë. Nuk do të ndalemi derisa ata që e shkaktuan këtë të japin llogari,” ka thënë Vuçiç.
Presidenti i Serbisë ka komentuar gjithashtu gjendjen e deputetëve të plagosur, përfshirë ligjvënësen Sonja Ilić, e cila ishte në muajin e 8 të shtatzënisë. “Sanja Ilić është mirë. Pavarësisht gjithçkaje, fëmija i saj do të lindë dhe do të jetë mirë,” ka shtuar Vuçiç.
Gjatë seancës së sotme plenare në Kuvendin e Serbisë, deputetët e opozitës u ngritën nga ulëset dhe aktivizuan mjete piroteknike në sallë, duke shkaktuar tym të kuq dhe të zi, ndërsa shpalosën një pankartë që kishte mbishkrimin “Serbia po ngrihet për të rrëzuar regjimin”.
