Një ditë pasi mbërritën në kampin e Gjadrit në Shëngjin, emigrantët e huaj të sjellë nga Italia duket se do të kthehen të gjithë mbrapsht.
Sipas një artikulli të publikuar në mediat italiane, bëhet e ditur se gjyqtarët e Seksionit të Emigracionit të Gjykatës së Romës kanë vendosur se 12 emigrantët e sjellë në Shqipëri duhet të kthehen në Itali, pavarësisht se kërkesat e tyre për azil janë refuzuar nga komisionet territorialë.
Sipas kryetares së këtij seksioni të gjyqësorit, Luciana Sangiovanni, ndalimi i emigrantëve nuk është bërë në përputhje me parimet e përcaktuara nga Gjykata Evropiane dhe për këtë arsye, janë shkelur ligjet ndërkombëtare që shërbejnë për mbrojtjen e të drejtave të emigrantëve.
Ky deklarim i Gjykatës Italiane thekson rëndësinë e mbrojtjes së të drejtave të njeriut për emigrantët, veçanërisht për ata nga vende që konsiderohen të pasigurta si Bangladeshi dhe Egjipti.
Kujtojmë se dy emigrantë u kthyen mbrapsht që ditën që erdhën, pasi ishin minorenë.
