Kryetari i Partisë Demokratike Sali Berisha ka reaguar lidhur me përplasjen e sotme të deputetëve demokratë, me punonjësit e Policisë dhe forcave special para ambienteve të Parlamentit.
Në fjalën e tij nga dritarja e shtëpisë ku del dhe proteston prej muajsh, Berisha i quajti forcat RENEA kriminelë, që i drejtuan armën deputetëve, që sipas tij përfaqësojnë vullnetin e popullit opozitar.
Berisha thotë se parlamenti është në agoni dhe jeta e tij është e shkurtër.
Pjesë nga fjala e Berishës:
“Sot në oborrin, në sallën e parlamentit, opozita e frymëzuar nga qytetarët opozitarë, e vendosur të mbrojë me mosbindje civile Kushtetutën, ligjin, të drejtat e popullit opozitar, dëshmoi se ai parlament i narkoshtetit, nuk meriton të jetë asnjë ditë më.
Se ai parlament është thjesht një vegël e verbër e Edi Ramës, i cili për të trysnuar, për të dhunuar deputetët e opozitës, dërgoi aty kriminelë të RENEA-s, të armatosur që u drejtuan tytat e armëve deputetëve, të cilët në misionin e mosbindjes civile po përfaqësonin vullnetin e popullit opozitar.
Aktet e sotme të Elisa Spirogjokës, të deputetëve, të mercenarëve me uniformë, gardistëve, të cilët zbatonin urdhrat e Spirogjokës, bastardit të familjes Hoxha në krye të ministrisë së rendit, që sillte i tmerruar për veten e tij, bandën e RENEA-s kundër deputetëve, dëshmoi se parlamenti është në agoni dhe se jetën e ka të shkurtër”.
Kujtojmë se ditën e sotme deputetet e opozitës nuk u lejuan të futen në kuvend dhe përplasjet me policinë nuk munguan.
