Ish-prokurori Arjan Ndoja ka shpallur kandidaturën e tij për Primaret brenda Partisë Demokratike, duke “luftuar” kështu me demokratët e tjerë për një vend në Parlamentin shqiptar.
Burime për Report Tv bëjnë me dije se Kryesia ka miratuar të tjerë emra për të hyrë në garën brenda Partisë Demokratike. Sipas të njëjtave burime mësohet se Berisha i kishte lënë afat shtesë disa personave, të cilët kishin kërkuar që të kishin më tepër kohë në dispozicion, mes tyre ka qenë dhe ish-prokurori Arjan Ndoja.
Ish-prokurori i Durrësit, nuk është një emër i pa njohur për publikun. Vite më parë, në 1 nëntor të vitit 2019, atij iu bë një atentat në mbikalimin e Shkozetit.
Automjeti ku po udhëtonin ish-prokurori, shoferi i tij Andi Maloku dhe Aleksandër Laho (alias Landi Muharremi) u qëllua me breshëri kallashnikovi. Ndoja dhe Laho arritën t’i shpëtonin vdekjes, ndërsa shoferi Maloku ndërroi jetë më 7 nëntor si pasojë e plagëve të rënda.
