Ukraina ka arritur marrëveshjen me Shtetet e Bashkuara të Amerikës për kushtet që lidhen me mineralet e rralla, sipas një burimi të qeverisë ukrainase për BBC. Deri tani, pala amerikane nuk ka dhënë ende një konfirmim.
Pasi të nënshkruhet, marrëveshja mund të çojë në krijimin e një partneriteti të ri afatgjatë mes Kievin dhe Shtëpisë së Bardhë, pas disa javësh shkëmbimesh gjithnjë e më të tensionuara. Marrëveshja do të përcaktojë kushtet për themelimin e një fondi të ri investimesh në mineralet e Ukrainës, materialet e rralla të tokës dhe burime të tjera natyrore të vlefshme.
Pas përfundimit të marrëveshjes, presidenti Volodymyr Zelensky ka në plan të udhëtojë për në Uashington të premten për një takim me Donald Trump, i cili është propozuar nga pala amerikane si takim “kokë më kokë”.
Pse SHBA dëshiron të ketë akses në mineralet e Ukrainës?
Mineralet e rëndësishme “janë themeli i ekonomisë së shekullit të 21”, sipas shkencëtarit politik Dr. Robert Muggah. Ato janë thelbësore për energjinë e rinovueshme dhe infrastrukturën industriale, si dhe përbëjnë një “rol strategjik në rritje në gjeopolitikë dhe gjeo-ekonomi”.
Po ashtu, SHBA është e interesuar të zvogëlojë varësinë e saj nga Kina, që aktualisht kontrollon rreth 75% të depozitave të tokës së rrallë në botë, sipas Grupit të Investimeve Gjeologjike. Kina ka kufizuar më parë eksportet e mineraleve të rralla për në SHBA dhe, në dhjetor, ndaloi eksportimin e disa prej tyre.
