Gazetarja Klodiana Lala, e ftuar në emisionin “Të Paekspozuarit” në MCN TV, ka komentuar kërcënimet dhe fyerjet e bëra nga Erion Veliaj ndaj prokurorit që po e heton, Ols Dado. Sipas Lala, kjo është një strategji e Veliajt, që synon që prokurori, pas kërcënimeve, të padisë dhe më pas të detyrohet të heqë dorë nga hetimi, por ajo theksoi se Ols Dado ka qëndruar i paluhatur ndaj presionit deri tani.
Gjithashtu, Lala ka folur për një audio që po qarkullon në media, e lidhur me Veliajn, ku thuhet se prokurori e ka quajtur kryebashkiakun “ndyrësirë”, një fakt që u mohua me forcë nga SPAK dhe gjykata. Ajo shtoi se ndaj Veliajt mund të ngrihet një akuzë për falsifikim.
“Gjuha e Veliajt është e papranueshme, por është strategjike. Kanosja ndaj prokurorit është vepër penale, që ndiqet me ankimin e prokurorit. Nëse Ols Dado i drejtohet institucioneve, duhet të japë dorëheqjen dhe të largohet nga çështja. Veliaj po ndjek këtë strategji për të detyruar prokurorin që të largohet. Deri tani Ols Dado i ka qëndruar presioneve. Gjuha është sigurisht e papranueshme.
Veliaj ka pretenduar sot, ka nxjerrë një transkript ku pretendohet se gjatë senacës së masës së sigurisë, prokurori i ka thënë “ndyrësirë”. Veliaj pretendon se e ka zbardhur nga audio këtë. Prokuroria dhe gjykata e mohuan këtë fakt, në asnjë moment gjatë dëgjimit të audios, nuk rezulton që prokurori ta ketë përdorur këtë shprehje. Ka një version audio të paqartë, por prokuroria e posaçme dhe gjykata, po shohin mundësinë e ngritjes së një akuze të re, për falsifikimin. Audio do ti nënshtrohet akt ekspertimi nën dyshimet për ndërhyrje të mundshme. Audio orgijinale e ka gjykata e posacme. Nëse ka manipuluar mund të ketë akuzë të re ndaj zotit Vrliaj.
Sistemi është lehtësisht i verifikueshëm nëse ka ndërhyrje, kjo është strategjia e prokurorëve”, tha Lala.
