Policia ka shpallur në kërkim të administratorin e kompanisë “Bana King”, Trifon Murataj, për një incident të rëndë që ka ndodhur në ambientet e kompanisë së tij në Durrës.
Një punonjës i kompanisë, 48-vjeçari A.G, është dëmtuar seriozisht teksa po hapte arkat e bananeve në kontenier, duke goditur syrin me bisturi. Si pasojë, ai ka humbur shikimin në një sy. Ngjarja ka ndodhur më 19 shkurt, dhe për pesë ditë, kompania ka mbajtur të fshehtë informacionin për incidentin.
Në deklaratën e saj para policisë, drejtuesit e kompanisë kanë deklaruar se “punonjësi nuk e ka njoftuar ngjarjen” dhe se ai ishte larguar për në një klinikë private bashkë me një koleg. Megjithatë, klinika ka refuzuar ta trajtojë, dhe 48-vjeçari ka shkuar më pas në spitalin shtetëror të Durrësit, ku është njoftuar policia dhe janë nisur hetimet për zbardhjen e rrethanave.
Pavarësisht dërgimit të tij në spital, punonjësi ka humbur shikimin dhe, sipas raporteve, ka qenë i punësuar pa dokumentet e nevojshme.
Policia ka reaguar vetëm sot pas publikimit të rastit në media, duke konfirmuar ngjarjen dhe duke shpallur në kërkim Trifon Muratajn, kreun e kompanisë “Zico”, e cila eksporton bananet “Bana King”.
Në një njoftim të policisë thuhet:
“Më datë 18.02.2025, shtetasi A. G., 48 vjeç, banues në Durrës, punonjës i një kompanie në portin e Durrësit, ka pësuar një dëmtim aksidental në sy gjatë punës. Grupi hetimor ka shkuar menjëherë në vendin e ngjarjes dhe ka kryer veprimet e para për zbardhjen e rrethanave dhe identifikimin e përgjegjësve. Materialet procedurale janë dërguar në Prokurorinë e Durrësit më 18.02.2025. Në vijim, më datë 18.02.2025, është shpallur në kërkim shtetasi T. M., 56 vjeç, banues në Tiranë, administrator i kompanisë, për veprën penale ‘Shkelja e rregullave të mbrojtjes në punë’. Puna për kapjen e tij vijon.”
