Një në çdo 20 gra në botë diagnostikohet me kancer gjiri, ndërsa 1 në 70 ka mundësi të vdesë nga kjo sëmundje gjatë jetës së saj, sipas një studimi të publikuar në revistën “Nature Medicine”.
Kanceri i gjirit është shkaku kryesor i vdekshmërisë nga kanceri tek gratë. Çdo minutë, katër gra diagnostikohen me këtë formë kanceri, dhe një grua humb jetën nga ky problem shëndetësor. Në vitin 2021, Organizata Botërore e Shëndetësisë (OBSH) lançoi Iniciativën Globale për Kancerin e Gjirit (GBCI), me qëllimin për të arritur një reduktim të vdekshmërisë nga kanceri i gjirit me 2.5% çdo vit.
Studiuesit shqyrtuan të dhënat mbi incidencën dhe vdekshmërinë e kancerit të gjirit në 185 shtete. Sipas gjetjeve të tyre, në vitin 2022, botërisht u regjistruan 2.3 milionë raste të reja dhe 670,000 vdekje nga ky lloj kanceri. Megjithatë, shpërndarja e këtyre rasteve ishte e pabarabartë.
Në vendet me Indekse më të larta të Zhvillimit Njerëzor (HDI), që përdoret për të matur cilësinë e jetës, normat e kancerit të gjirit janë më të larta. Ndërsa në vendet me HDI më të ulët, gratë që diagnostikohen me kancer gjiri kanë norma vdekshmërie që janë shumë më të larta.
