Kryeministri Edi Rama ka vijuar edhe ditën e sotme me përgjigjen e komenteve në rrjetet e tij sociale, në rubrikën që ai e ka titulluar “Sy m’Sy”.
“Une punoj coban dhe marr 1000 euro shtepi drita uje i paguan pronari. Ne Shqiperi punoja ne nje karburant per 250 mije leke mos beni krahasime koti.”, ishte një nga komentet së cilës Rama iu përgjigj.
Kreu i qeverisë tha se ka kohë që në Shqipëri nuk ka rroga 250 mijë lekë të vjetra. Më tej shtoi se 57% e rrogave në Shqipëri nuk kanë asnjë taks, ndërsa 36% e tyre kanë nga 4 deri në 10%. Sipas kryeministrit në turizëm dhe ndërtim në Shqipëri, merr sa në Greqi dhe paguan më pak taksë dhe kur punon jashtë qytetit tënd fjetjen dhe ushqimin ta paguan kompania.
Lidhur me kthimin e shqiptarëve në vend, Rama tha se kush vjen sot i krijon vetes mundësi të fitojë më shumë, sesa kur vendi të anëtarësohet në BE.
“E para ka kohë që nuk ka rroga 250 mijë lekë të vjetra në Shqipëri, edhe e dyta rroga është ajo që duket, po pas asaj ka dhe taksa. Që ta dini 57% e rrogave në Shqipëri nuk kanë asnjë taks, ndërsa 36% e tyre kanë nga 4 deri në 10%. E dyta, në turizëm dhe ndërtim në Shqipëri, merr sa në Greqi dhe paguan më pak taksë, ndërsa kur je jashtë qytetit tënd, fjetjen dhe ushqimin ta paguan kompania. Këto janë fakte. Me këto shpjegohet dhe kthimi i atyre që vijnë dhe punojnë në turizëm apo investojnë në agroturizëm. Edhe e treta, avash me kekun dhe byrekun se nuk janë më kohët si dikur. Nuk është më njësoj bota dhe Europa sot më atë që ishte deri dje. Kostoja e jetesës në Europë është rritur aq shumë, sa nuk ka më kursime si dikur. Gjithkush le ti shoh me qetësi opsionet e veta dhe ta shoh nëse do të kthehet plotësisht apo pjesërisht. Apo qoftë duke investuar këtu dhe duke jetuar atje. Jemi në rrugën drejt majës së Shqipërisë 2030. Për pak vite do jemi anëtare të Bashkimit Europian. Gjithçka do të ndryshojë, por kush vjen sot i jep vetes mundësi të fitojë më shumë përpara hyrjes në BE dhe gjithcka këtu të bëhet si kudo tjetër.”, u shpreh Rama.
