Kreu i Operatorëve Turistikë, Arben Çipa është dhunuar ditën e djeshme në Sarandë.
Ky i fundit ka përjetuar një sulm brutal pas një konflikti me 2 persona të tjerë, lidhur me një projekt biznesi.
Në pamje, Çipa shfaqet i gjakosur, me shenja të dukshme në fytyrë të grushtave dhe përdorimit të sendeve të forta, që sipas tij janë përdorur nga autorët.
Ngjarja ka ndodhur gjatë orëve të drekës dje, kur biznesmeni Çipa ishte në rrugë duke u drejtuar për në punën e tij.
Sipas deklaratave të bëra nga Çipa të dy personat që e sulmuan kishin të bëjnë me një projekt biznesi, për të cilin kishte pasur kundërshti. Njëri nga personat dhunues, Çipa thotë se është administratori i një klubi nate i quajtur “Four elements”.
Ai tregon se teksa ishte në rrugë, një prej sulmuesve, i identifikuar si Dio, e ka ndaluar dhe ka filluar të diskutonte lidhur me projektin që ka përplasur të dy palët.
“Unë isha duke shkuar në punë, kur papritur një person me emrin Dio, i cili është administrator i “Four elements”, më ka prerë rrugën bashkë me një tjetër dhe ka nisur të fliste për një çështje lidhur me një projekt timin. Ata ishin duke bërë gjithçka për të penguar zhvillimin e tij dhe këtë e shprehnin në formë fyerjesh,” tha Çipa në deklaratën e tij.
“Në atë moment unë nuk i kam pranuar fyerjet dhe ata kanë shfrytëzuar momentin dhe më janë vërsulur brenda makinës time me grushte dhe gurë dhe e kam pasur të pamundur të mbrohem në atë moment”, tregon ai.
Pas sulmit, Çipa ka pësuar lëndime të rënda, duke përfshirë gjakderdhje dhe plagë të shumta, dhe është transportuar menjëherë në spital për trajtim mjekësor.
