Digjitalizimi dhe futja e teknologjisë në shkolla ka sjellë një revulucion sa i takon vlerësimit të nxënësve, pasi regjistrat normalë tashmë thuajse janë zhdukur.
Ashtu si në arsimin parauniversitar, edhe arsimi i lartë, tani përdor sistem informatik për regjistrimin në provime apo për listën e notave.
Por ky sistem shpesh shfaq problematika që i shqetësojnë studentët! Në këtë situatë janë dhe
Sudentët e Universitetit të Tiranës, të cilët logohen përmes kredencialeve në e-albania në sistemin e-student. Gjatë sezonit të testimeve, të rinjtë shfaqin shqetësimin mbi problemet teknike të këtij database digjital që jo gjithmonë ju njeh rezultatet e provimeve.
“Disa studentë, të paktën të klasës sime, janë akoma në dilemë për disa provime të vitit të parë sepse nuk e dinë akoma çfarë notash kanë marr. Praktikisht ata janë në vit të dytë, por sistemi nga ana teknologjike çalon sepse nuk nxjerr notat. E kemi dhënë provimin, jemi të regjistruar, pedagogu e ka bërë punën me korrigjimin e ka dhënë vlerësimin, por sistemi nuk nxjerr notën. Në këtë moment studentët vijnë ankohen te unë se jam koordinatorja e duhet të adresoj problemin diku tjetër, se nuk dinë çfarë të bëjnë. A duhet ta përsërisin provimin?”, shprehet një studente.
Ajo thotë se e ka raportuar problematikën e sistemit e-student në disa hallka zinxhir, por që nuk ka gjetur zgjidhje: “Si fillim e shpreh te pedagogu, e konfirmon që notën e ka hedhur në sistem dhe nuk ka çfarë bën tjetër. Shkoj te sekretaria pyes e më kthen përgjigjen e saj për kompetencat që ka kryer ok procedurat, ka bërë regjistrimet. Pra në këtë situatë nuk është përgjegjësia e askujt, vec një problem teknik i sistemit që nuk dimë si ta zgjidhim”.
Metoda e vetme funksionale në këtë institucion arsimor publik është sistemi e-student. Të gjendur në këto kushte, studentët shpresojnë të marrin fund paqartësitë mbi pasqyrimin e mangët të notave në të gjithë provimet që kanë dhënë.
“Ne notën mund ta marrim edhe gojarisht por nuk vlen, për shkak se duhet të kalojë nota në sistem e lënda quhet e mbyllur. Nuk ka një regjistër fizik, është e vetmja mënyrë për të ditur mesataren. Kërkoj që për sa kohë sistemi ekziston dhe është metodë praktike për studentët, këto vështirësitë teknike të rregullohen”, thotë studentja.
Duke vlerësuar lehtësitë e pasjes së një regjistri digjital, studentët kërkojnë zgjidhjen e problemeve teknike që ju rrezikon edhe përfundimin e vitit studimor.
