Bashkëshortja e kryetarit të Bashkisë së Tiranës, Ajola Xoxa është paraqitur mëngjesin e kësaj të premte në ambientet e Prokurorisë së Posaçme kundër Korrupsionit dhe Krimit të Organizuar.
Xoxa është paraqitur për respektimin e masës së sigurisë të dhënë nga GJKKO. Gjyqtari Erion Bani vendosi gjatë seancës së 12 shkurtit që të ndryshonte masën e sigurisë ndaj bashkëshortes së kryetarit Erion Veliaj, nga “arrest shtëpie” në “detyrim paraqitje”.
Xoxa ka detyrim për t’u paraqitur para oficerit të BKH-së të premten e parë dhe të tretë të çdo muaji, në orën 11:00. Por, duke qenë se ajo është paraqitur shumë më herët se orari që i është caktuar nga Gjykata, pritet të konfirmohet në vijim nëse është paraqitur vetëm për zbatimin e urdhrit të GJKKO-së, apo dhe për arsye të tjera.
Kujtojmë se gjatë seancës së zhvilluar më 12 shkurt gjyqtari Erion Bani vendosi masën “detyrim paraqitje” për zonjën Xoxa, ndërsa për bashkëshortin e saj, kryebashkiakun Erion Veliaj masën e sigurisë “arrest me burg”.
Veliaj akuzohet për “Korrupsion pasiv i funksionarëve të lartë shtetërorë ose të zgjedhurve vendorë” si dhe “Pastrim i produkteve të veprës penale ose veprimtarisë kriminale”. Vlen të theksohet se këto vepra penale dyshohen se janë konsumuar plot 9 herë nga çifti Veliaj – Xoxa, kjo e fundit me 3 akuza zyrtare, të cilat janë: “Korrupsioni pasiv i funksionarëve të lartë shtetërorë ose i të zgjedhurve vendorë”, kryer në bashkëpunim (9 herë), “Pastrimi i produkteve të veprës penale ose veprimtarisë kriminale”, “Refuzimi për deklarimin, mosdeklarimi, fshehja ose deklarimi i rremë i pasurive, interesave privatë të personave të zgjedhur dhe nëpunësve publikë ose i çdo personi tjetër që ka detyrimin ligjor për deklarim”
