Pas debutimit spektakolar në bursë, aksionet e kompanisë Anthropic kanë pësuar rënie vetëm një ditë më vonë, duke treguar se entuziazmi i investitorëve për inteligjencën artificiale nuk është aq i qëndrueshëm sa dukej. Aksionet e kompanisë, krijueses së chatbot-it Claude, ranë rreth 7% në tregtimin paraprak të së premtes, pasi një ditë më parë kishin përfunduar me rritje prej më shumë se 17%.
Rënia vjen pas një debutimi historik, ku aksionet u hapën me 111.50 dollarë, shumë mbi çmimin fillestar prej 83 dollarësh, ndërsa vlerësimi i kompanisë kaloi përkohësisht 2 trilionë dollarë. Megjithatë, investitorët po bëhen gjithnjë e më të kujdesshëm ndaj shpenzimeve gjigante për infrastrukturën e inteligjencës artificiale, kostove të qendrave të të dhënave dhe pasigurisë se kur kompanitë e këtij sektori do të arrijnë fitime të qëndrueshme.
Rënia e Anthropic ka ushtruar presion edhe mbi tregjet e teknologjisë, duke shtuar shqetësimet për një flluskë të mundshme në sektorin e inteligjencës artificiale. Analistët vlerësojnë se investitorët nuk po vënë më bast vetëm mbi potencialin e teknologjisë, por po kërkojnë prova konkrete se miliardat e investuara do të kthehen në fitime. Debutimi rekord nuk mjaftoi për të qetësuar tregun, i cili po përpiqet të kuptojë nëse vala e AI-së justifikon vlerësimet marramendëse.











