Italia është përfshirë këtë të premte në një grevë të përgjithshme, e shoqëruar me protesta dhe marshime në mbi 100 qytete të vendit. Punonjës, studentë dhe organizata sindikale kanë dalë në rrugë për të kundërshtuar modelin aktual social dhe ekonomik, duke kërkuar masa për përmirësimin e kushteve të jetesës dhe përballimin e kostos së lartë të jetesës.
Greva është organizuar nga Konfederata e Përgjithshme Italiane e Punës (CGIL) dhe përfshin sektorin publik dhe privat. Protestat janë shtrirë në qytetet kryesore të vendit, ndërsa në mobilizim janë përfshirë edhe organizata të tjera sindikale dhe studentore.
Në protestë janë bashkuar edhe përfaqësues të opozitës së majtë, mes tyre Elly Schlein, Giuseppe Conte dhe Nicola Fratoianni. Sekretari i përgjithshëm i CGIL, Maurizio Landini, pritet të mbajë fjalimin kryesor në Romë.
Ndërprerje në arsim dhe shëndetësi
Efektet e grevës pritet të ndihen në disa sektorë të rëndësishëm të jetës së përditshme. Në arsim, funksionimi i shkollave do të varet nga pjesëmarrja e mësuesve dhe personelit në grevë, ndaj prindërve u është rekomanduar të kontrollojnë paraprakisht nëse institucionet arsimore do të jenë të hapura.
Edhe në sektorin shëndetësor parashikohen vështirësi, me anulime ose shtyrje të vizitave mjekësore, ekzaminimeve dhe ndërhyrjeve kirurgjikale jo urgjente.
Transporti publik, ndërprerje dhe orare të reduktuara
Greva prek gjithashtu transportin publik në shumë qytete italiane, ku autobusët, tramvajet dhe metrotë pritet të pësojnë ndërprerje, duke respektuar oraret e garantuara të shërbimit.
Në disa qytete janë parashikuar ndërprerje në orare të caktuara:
Gjenova: 09:00–17:30 dhe nga 20:30 deri në përfundim të shërbimit.
Bolonja: 08:30–16:30 dhe nga 19:30 deri në fund të shërbimit.
Firence: 08:15–12:30 dhe nga 14:30 e në vazhdim.
Roma: 08:30–17:00 dhe nga 20:00 deri në përfundim të shërbimit.
Palermo: 08:30–17:30 dhe nga 20:30 deri në përfundim të shërbimit.
Disa kompani transporti janë përjashtuar nga greva pas ndërhyrjes së Komisionit për Garancinë e Grevave, përfshirë shërbimet në Milano, Venecia, Torino, Bolzano, Trento, Napoli dhe Bari.
Trenat dhe transporti ajror jashtë grevës
Sektori ajror dhe ai hekurudhor janë përjashtuar nga greva e së premtes, për të shmangur ndërprerjet e njëpasnjëshme të shërbimeve. Megjithatë, udhëtimet me tren mund të preken nga një tjetër grevë 24-orëshe, e shpallur nga sindikatat SGB dhe CUB, e cila nis në orën 21:00 të së premtes.
Ministri i Transportit, Matteo Salvini, ka deklaruar se kompania Ferrovie dello Stato do të garantojë funksionimin normal të trenave gjatë së premtes, ndërsa për të shtunën parashikohet të qarkullojë 95% e trenave me shpejtësi të lartë dhe 85% e trenave Intercity.
Në Milano dhe Romë janë planifikuar disa marshime të organizuara nga sindikatat, studentët dhe grupet sociale, ndërsa autoritetet kanë marrë masa për garantimin e sigurisë gjatë protestave.
Mobilizimi pritet të zgjasë gjatë gjithë ditës, në një klimë tensioni social, ku kërkesat kryesore të protestuesve lidhen me rritjen e kostos së jetesës, kushtet e punës dhe ndryshimin e politikave ekonomike e sociale.











