Një në tre të rinj të brezit Z mbështetet te inteligjenca artificiale për shoqëri dhe komunikim emocional. Ky është një nga përfundimet e një studimi të Gallup dhe Digital Wellness Lab, i cili përfshiu 15.925 të rinj të moshës 15 deri në 22 vjeç, në 16 vende të botës.
Sipas raportit, përqindja shkon në 50 për qind mes atyre që përdorin çdo ditë inteligjencën artificiale. Studiuesit zbuluan gjithashtu se të rinjtë që mbështeten te miqtë vetëm në internet ose te chatbot-ët kanë më shumë gjasa të përjetojnë vetmi. Ndërkohë, marrëdhëniet ballë për ballë vlerësohen si më të forta dhe më mbështetëse emocionalisht.
Ekspertët theksojnë se inteligjenca artificiale mund të ndihmojë në plotësimin e boshllëqeve sociale, por nuk e zëvendëson dot lidhjen njerëzore. Një nga pyetjet që mbetet për t’u studiuar është nëse të rinjtë i drejtohen chatbot-ëve sepse ndihen të vetmuar, apo nëse kjo marrëdhënie mund ta thellojë më tej vetminë.











