Shoferët që udhëtojnë me shpejtësi shumë të ulët në segmente të caktuara të autostradave në Itali mund të përballen me gjoba deri në 160 euro. Masa e re synon të përmirësojë qarkullimin dhe të shmangë pengesat në rrjedhën e trafikut.
Sipas raportimeve të portalit ligjor italian “Brocardi” dhe faqes zvicerane të informacionit “Blue News”, rregulli do të zbatohet fillimisht në autostradat me gjashtë korsi, pra në ato që kanë të paktën tri korsi për secilin drejtim.
Projekt-rregullorja parashikon një shpejtësi minimale prej 100 km/h në korsinë që ndodhet menjëherë pranë ndarëses qendrore të autostradës.
Megjithatë, do të ketë përjashtime në rastet kur sinjalistika rrugore përcakton një kufi tjetër shpejtësie ose kur kushtet e qarkullimit e bëjnë të nevojshme lëvizjen më ngadalë. Këtu përfshihen mjegulla e dendur, reshjet e forta të shiut, aksidentet, punimet në rrugë dhe trafiku i rënduar.
Gjobat e parashikuara variojnë nga 40 deri në 160 euro. Kjo masë është pjesë e projektit të Kodit të ri Rrugor, të miratuar nga Këshilli i Ministrave në muajin tetor dhe të dërguar në Parlament, ndërsa teksti përfundimtar pritet të miratohet.
Italia është një nga destinacionet më të frekuentuara nga turistët që udhëtojnë me automjet. Sipas të dhënave të agjencisë italiane për mjedisin ISPRA, gjatë vitit 2024 rreth 40.7 milionë vizitorë të huaj hynë në vend me makinë, duke përfaqësuar afro 46% të të gjitha mbërritjeve ndërkombëtare.
Ndërkohë, në Gjermani, ku një pjesë e madhe e autostradave nuk ka kufizime shpejtësie, nuk ekziston një ligj që ndalon në mënyrë të drejtpërdrejtë drejtimin shumë të ngadaltë. Megjithatë, pengimi i qarkullimit konsiderohet kundërvajtje administrative dhe dënohet me gjobë.
Edhe në shumë vende të tjera, drejtimi i automjetit me shpejtësi dukshëm më të ulët se rrjedha normale e trafikut, kur pengon qarkullimin ose rrezikon përdoruesit e tjerë të rrugës, mund të ndëshkohet. Kjo praktikë është e ndaluar edhe në Itali dhe Zvicër.











