Një studim i ri nga Universiteti i Misurit sugjeron se mbajtja e një rutine të qëndrueshme gjatë ditës mund të lidhet me më pak dhimbje fizike dhe më pak simptoma depresive, veçanërisht te të moshuarit. Studiuesit analizuan të dhënat e 67 personave, përfshirë individë që vuanin nga pagjumësia, dhe zbuluan se ata që mbanin orare më të rregullta për aktivitetet e përditshme raportonin gjendje më të mirë fizike dhe emocionale.
Sipas kërkuesve, rëndësi nuk ka vetëm ora kur shkojmë për të fjetur, por edhe koha kur zgjohemi, hamë, punojmë dhe ndërveprojmë me të tjerët. Këto zakone ndihmojnë në sinkronizimin e ritmit cirkadian, orës së brendshme biologjike që rregullon gjumin, hormonet, metabolizmin dhe humorin.
Megjithatë, studiuesit theksojnë se rezultatet tregojnë një lidhje dhe nuk provojnë se rutina shkakton drejtpërdrejt uljen e dhimbjeve apo të simptomave depresive. Studimi, i publikuar në revistën Journal of Behavioral Medicine më 14 nëntor, sugjeron se edhe ndryshime të vogla, si zgjimi dhe ngrënia në orare të përafërta çdo ditë, mund të jenë pjesë e një stili më të shëndetshëm jetese.
