Rruga e zëvendëspresidentit amerikan JD Vance drejt Shtëpisë së Bardhë në vitin 2028 është bërë dukshëm më e pasigurt, pas humbjes së thellë të republikanëve në zgjedhjet e mesmandatit. Sipas CNN, rezultati ka hapur një debat brenda Partisë Republikane për të ardhmen e Donald Trump dhe për atë se kush duhet të udhëheqë lëvizjen politike pas tij.
Vance duket se e ka kuptuar rrezikun politik. Të mërkurën pas zgjedhjeve, ai fajësoi luftën me Iranin për humbjet e republikanëve, duke u distancuar nga disa prej vendimeve të politikës së jashtme të Trump.
Në një reagim të gjatë në rrjetin social X, ai paraqiti edhe disa prej prioriteteve që mund të përbëjnë platformën e tij për vitin 2028: përfundimin e luftës, uljen e kostos së jetesës, përqendrimin te problemet e brendshme dhe rishikimin e marrëdhënieve të SHBA-së me Izraelin.
Ndërkohë, Vance nuk është i vetmi emër që përmendet për garën e ardhshme presidenciale. Brenda kampit republikan ka edhe figura të tjera me ambicie politike, ndërsa mbështetësit e partisë janë të ndarë për drejtimin që duhet të marrë ajo pas Trump. Sipas CNN, e ardhmja politike e Vance do të varet jo vetëm nga mënyra se si do të menaxhojë marrëdhënien me presidentin, por edhe nga aftësia për të fituar mbështetjen e një partie të tronditur nga rezultatet zgjedhore.
