Një histori e veçantë nga Belgjika ka tërhequr vëmendjen e mediave, pasi një ish-shofer taksie ka trashëguar një pronë me vlerë rreth 500 mijë euro nga një grua që e kishte transportuar për 18 vite me radhë.
Bëhet fjalë për 53-vjeçarin Joeri Cools, nga qyteti i Gentit, i cili kishte krijuar një marrëdhënie të veçantë besimi me Annie-n, një kliente që e zgjidhte vazhdimisht për udhëtimet e saj. Gruaja jetonte në Bruksel dhe udhëtonte çdo javë drejt Gentit, ku vijonte rrugën me taksinë e tij.
Me kalimin e viteve, marrëdhënia e tyre u bë më e afërt dhe gjatë udhëtimeve ata ndanin histori personale dhe përvoja nga jeta. Annie nuk ishte martuar dhe nuk kishte fëmijë, ndërsa kishte krijuar një besim të veçantë te shoferi. “Ju njoh ju, ju besoj juve”, i thoshte ajo sa herë hipte në taksinë e tij.
Në shtator, Cools mori një letër nga noteri, ku u informua se Annie kishte ndërruar jetë në qershor të vitit 2025, në moshën 81-vjeçare, dhe se në testament i kishte lënë një pronë me vlerë rreth 500 mijë euro. Gruaja kishte vendosur që pasurinë e saj ta ndante mes njerëzve që kishte vlerësuar gjatë jetës, duke lënë nga një apartament edhe për tri mikeshat e saj të ngushta.
Vendimi për ta përfshirë ish-shoferin në testament ishte marrë që në vitin 2011. Megjithatë, trashëgimia shoqërohet edhe me një detyrim të konsiderueshëm financiar, pasi sipas përllogaritjeve ai duhet të paguajë rreth 358 mijë euro taksa. Nëse vendos ta shesë pronën, atij pritet t’i mbeten rreth 140 mijë euro. Vetë Cools e sheh këtë trashëgimi jo vetëm si një përfitim financiar, por edhe si dëshmi të një marrëdhënieje besimi që zgjati për gati dy dekada.
