Julian Álvarez dukej se po e rindërtonte marrëdhënien me tifozët e Atlético Madridit, por ndeshja ndaj Barcelonës e riktheu gjithçka në pikën e nisjes.
Sulmuesi argjentinas pati dy mundësi shumë të mira për të shënuar, por i shpërdoroi të dyja dhe në “Metropolitano” u dëgjuan sërish fishkëllimat.
Rasti më i madh erdhi që në minutën e gjashtë, kur Álvarez doli i vetëm përballë Joan Garcías. Ai hezitoi tepër gjatë dhe portieri i Barcelonës arriti t’i hiqte topin nga këmbët.
Pak minuta më vonë, argjentinasi reagoi duke dhënë asistin për golin e Giuliano Simeones, që kaloi Atléticon në avantazh.
Megjithatë, Álvarez pati edhe një tjetër mundësi për të shënuar. Këtë herë provoi ta kalonte Joan Garcían me një parabël, por topi përfundoi shumë mbi portë.
Sipas “Sport”, marrëdhënia mes lojtarit dhe tifozëve kishte nisur të përmirësohej pas golave të fundit dhe kërkesës publike për falje për deklaratat e bëra gjatë verës, kur kishte shprehur dëshirën për t’iu bashkuar Barcelonës.
Por paraqitja ndaj katalanasve ndryshoi përsëri atmosferën.
Diego Simeone, megjithatë, vazhdon ta mbështesë sulmuesin dhe nuk e zëvendësoi gjatë ndeshjes.
“E duam shumë dhe kemi nevojë për të. Na duhet versioni më i mirë i Julian Álvarez dhe do të punojmë me të”, deklaroi trajneri i Atleticos.
Për Álvarez, rruga drejt pajtimit të plotë me tifozët mbetet ende e gjatë.
