Hetimet e Prokurorisë së Posaçme (SPAK) ndaj ish-drejtoreshës së Shërbimit Informativ Shtetëror, Vlora Hyseni, kanë marrë një tjetër drejtim, duke u zgjeruar përtej çështjeve që ishin objekt verifikimi deri më tani.
Mësohet se, krahas hetimeve të mëparshme, SPAK ka regjistruar edhe akuza të reja në ngarkim të ish-zyrtares së lartë, të cilat lidhen me dyshime për korrupsion dhe pastrim parash.
Zgjerimi i hetimeve sinjalizon se organi i posaçëm i akuzës po shqyrton edhe aspekte të tjera të aktivitetit të saj, ndërsa pritet që hetimet të hedhin më shumë dritë mbi dyshimet që kanë çuar në regjistrimin e veprave të reja penale.
Deri në këtë fazë, bëhet fjalë për dyshime që janë pjesë e një procesi hetimor dhe jo për fakte të provuara me vendim gjyqësor. Hetimet e SPAK pritet të përcaktojnë nëse ekzistojnë prova që mbështesin akuzat e regjistruara.
