Ajo që nisi si një lodër koleksionimi u kthye në një fenomen global, por mania për kukullat Labubu duket se po humbet vrullin. Kompania kineze Pop Mart, prodhuesja e tyre, ka raportuar një rënie të ndjeshme të shitjeve, duke sinjalizuar se interesi i konsumatorëve për monstrat me dhëmbë të mprehtë dhe pamje karakteristike nuk është më në nivelet e vitit të kaluar. Në tre muajt deri në fund të shtatorit, të ardhurat e kompanisë ranë me 45 deri në 50 për qind krahasuar me të njëjtën periudhë të vitit 2025.
Kulmi i fenomenit u arrit gjatë vitit 2025, kur personazhet u kthyen në aksesorë mode, të varur në çanta dhe të koleksionuar nga të famshëm, yje të muzikës dhe miliona përdorues të rrjeteve sociale. Sistemi i kutive misterioze, ku blerësit nuk e dinë se cilën kukull do të marrin, nxiti blerje të përsëritura dhe një treg të madh rishitjeje, ku disa modele shiteshin me çmime shumë më të larta se ato fillestare. Disa koleksionistë shpenzuan mijëra dollarë për të siguruar modelet më të rralla.
Por shenjat e lodhjes së tregut janë bërë të dukshme. Në Amerikë, shitjet e Pop Mart ranë me 70 deri në 75 për qind gjatë tremujorit të tretë, ndërsa edhe në Kinë kërkesa është dobësuar. Koleksionistët po orientohen drejt trendeve të tjera, ndërsa analistët paralajmërojnë se kompania do ta ketë të vështirë të përsërisë suksesin e jashtëzakonshëm të Labubu. Pop Mart po përpiqet të mbajë interesin përmes dyqaneve të reja dhe personazheve të tjerë, por rasti i Labubu tregon sa shpejt mund të shuhet një fenomen viral.
