Një valë kërcënimesh për vendosjen e bombave ka shkaktuar kaos në trafikun ajror evropian, duke prekur të paktën 32 fluturime të 12 kompanive ajrore brenda vetëm katër ditësh. Edhe pse deri tani të gjitha alarmet kanë rezultuar të rreme, autoritetet janë detyruar të ndërhyjnë, duke devijuar avionë, kryer kontrolle emergjente dhe angazhuar avionë luftarakë për shoqërimin e disa fluturimeve.
Disa prej incidenteve kanë përfshirë fluturime drejt Romës, Milanos, Parisit, Pragës dhe Sofjes. Një avion i kompanisë irlandeze Aer Lingus, që fluturonte nga Dublini drejt Romës, u shoqërua nga avionë luftarakë francezë dhe u ul në një bazë ushtarake në Évreux. Për shkak të devijimit dhe vonesave, avioni përfundoi rreth 1.000 kilometra larg destinacionit të planifikuar, pasi kishte konsumuar një pjesë të konsiderueshme të karburantit.
Kërcënimet janë dërguar përmes telefonatave dhe emaileve, por ende nuk është identifikuar përgjegjësi i tyre. Ekspertët e sigurisë paralajmërojnë se incidentet mund të jenë pjesë e një fushate më të koordinuar destabilizimi, megjithëse nuk ka prova që i lidhin ato me një shtet të caktuar. Për kompanitë ajrore, sfida është e madhe, pasi çdo kërcënim duhet trajtuar si real deri në përfundimin e kontrolleve të sigurisë.
