Nga dyshimet dhe kritikat, te elozhet. Fabián Ruiz po jeton një nga momentet më të mira të karrierës dhe paraqitja spektakolare ndaj Villarrealit ka bërë që edhe mediat franceze të dorëzohen përfundimisht para nivelit të tij.
Mesfushori spanjoll ishte protagonist absolut në fitoren 6-0 të PSG-së në “La Cerámica”, duke realizuar dy gola dhe duke u shpallur lojtari më i mirë i ndeshjes.
Fabián kontrolloi mesfushën, udhëhoqi lojën e parisienëve dhe dha një tjetër provë se aktualisht është ndër mesfushorët më në formë në Europë.
Shifrat ndaj Villarrealit ishin mbresëlënëse: 95 pasime të sakta nga 104 të tentuara, tre goditje në portë, tetë pasime të gjata të sakta nga nëntë tentativa dhe shtatë rikuperime topi.
Me dygolëshin e fundit, spanjolli ka arritur në katër gola në katër ndeshje të këtij edicioni të Champions League, më shumë sesa kishte realizuar në dy sezonet e mëparshme së bashku në kompeticion.
Transformimi i tij te PSG lidhet ngushtë edhe me besimin e Luis Enrique. Në një moment kur në Francë diskutohej edhe mundësia e largimit të Fabián, trajneri spanjoll bllokoi çdo ide për shitjen e tij dhe vazhdoi ta konsideronte një element kyç të skuadrës.
Luis Enrique më parë kishte pranuar madje se një nga gabimet më të mëdha të karrierës së tij ishte mosgrumbullimi i Fabián për Botërorin e Katarit.
Edhe “L’Équipe”, një nga mediat që kishte qenë kritike ndaj tij në të kaluarën, e vlerësoi paraqitjen ndaj Villarrealit me notën 9 nga 10, duke evidentuar pozicionimin, saktësinë dhe inteligjencën e tij në lojë.
Nga një futbollist i diskutuar pas mbërritjes në Paris në vitin 2022, Fabián është shndërruar në një prej pikave kryesore të PSG-së dhe po kalon ndoshta periudhën më të mirë të karrierës së tij.
