Të paktën 24 persona janë vrarë nga bombardimet ruse ndaj një qendre të shpërndarjes së ndihmave humanitare në rajonin e Zaporizhzhias, në juglindje të Ukrainës. Sipas autoriteteve ukrainase, bombat goditën një shkollë në fshatin Komyshuvakha, e cila përdorej për shpërndarjen e ndihmave, si dhe një strehë pranë saj. Rreth 20 persona rezultojnë të zhdukur, ndërsa autoritetet paralajmërojnë se numri i viktimave mund të rritet.
Presidenti ukrainas Volodymyr Zelensky tha se sulmi ndaj qendrës humanitare tregon se Moska nuk po kërkon uljen e tensioneve. Sipas raportimeve, pas goditjes së parë, persona që ishin larguar nga shkolla për t’u strehuar në një ndërtesë aty pranë u goditën nga një sulm i dytë. Operacionet e kërkim-shpëtimit po zhvillohen me vështirësi për shkak të sulmeve të tjera me dronë në zonë.
Sulmi vjen pas përfundimit të një armëpushimi të kufizuar në rajonin e Khersonit, i cili mundësoi evakuimin e qindra banorëve nga qyteti i pushtuar Oleshky dhe dërgimin e ndihmave humanitare. Ndërkohë, sulme të tjera ruse me dronë në qytete të ndryshme të Ukrainës kanë plagosur të paktën 17 persona.
