Viktor Orban humbi zgjedhjet në Hungari pas 16 vitesh në pushtet, por Donald Trump mund t’i hapë një tjetër derë politike, këtë herë në krye të Organizatës së Kombeve të Bashkuara. Sipas gazetës amerikane Wall Street Journal, zyrtarë të administratës Trump po punojnë për të mbështetur kandidaturën e ish-kryeministrit hungarez për postin e sekretarit të përgjithshëm të OKB-së.
Madje, Orban mund të jetë një kandidat i përbashkët i SHBA-së, Rusisë dhe Kinës. Gazeta shkruan se burime në të tria vendet kanë konfirmuar mbështetjen e administratës amerikane për këtë ide, por deri tani nuk ka asnjë vendim përfundimtar dhe zgjedhja e tij mbetet e pasigurt.
Ish-kryeministri hungarez u largua nga pushteti në prill, kur partia Tisza e Peter Magyar fitoi zgjedhjet parlamentare, duke i dhënë fund qeverisjes së tij 16-vjeçare me shumicë absolute.
Gjatë viteve në pushtet, Orban pati përplasje të vazhdueshme me aleatët perëndimorë, përfshirë Bashkimin Europian dhe NATO-n, për shkak të politikave të tij kundër emigracionit, qëndrimeve euroskeptike dhe problemeve me shtetin e së drejtës në Hungari. Por marrëdhëniet me Donald Trump, Vladimir Putin dhe presidentin kinez Xi Jinping mbetën të afërta.
Pas humbjes së zgjedhjeve, disa ish-zyrtarë të qeverisë së tij janë përballur me hetime për mashtrim dhe korrupsion. Dy ish-ministra dhe ish-guvernatori i Bankës Kombëtare të Hungarisë janë arrestuar, ndërsa autoritetet mund të shqyrtojnë edhe nëse vetë Orban ka pasur ndonjë përfshirje në këto çështje.
Sipas Wall Street Journal, edhe brenda administratës amerikane pranohet se propozimi për Orbanin mund të duket i pazakontë. Një zyrtar i Departamentit të Shtetit tha se ideja tingëllon fillimisht e çuditshme, por bisedimet e mëparshme me Uashingtonin sugjerojnë se edhe Moska dhe Pekini mund ta mbështesin.
“Nëse Shtetet e Bashkuara, Rusia dhe Kina duan të njëjtën gjë në Këshillin e Sigurimit, zakonisht ia arrijnë”, i thanë gazetës zyrtarë nga SHBA-ja dhe një vend tjetër.
Posti që synohet për Orbanin aktualisht mbahet nga Antonio Guterres, mandati i dytë pesëvjeçar i të cilit përfundon më 31 dhjetor.
Megjithatë, as Shtëpia e Bardhë, as Rusia dhe as Kina nuk e kanë konfirmuar zyrtarisht planin. Euronews ka kërkuar një koment nga zëdhënësi i Orbanit, por nuk ka marrë përgjigje. Më parë, ai kishte cilësuar si “lajme të rreme” raportimet se ish-kryeministri mund të kandidonte për postin e zëvendëssekretarit të përgjithshëm të OKB-së.
Një tjetër detaj lidhet me hetimet në Hungari. Në maj, buletini investigativ VSquare raportoi se një detyrë në OKB mund të ishte me interes për Orbanin edhe për shkak të imunitetit diplomatik që shoqëron këtë post.
Por rruga drejt drejtimit të OKB-së nuk është e thjeshtë. Sipas Wall Street Journal, Orban do të hynte në garë vetëm nëse do ta kishte të sigurt fitoren, gjë që për momentin duket pak e mundshme.
Për t’u zgjedhur, atij do t’i duheshin të paktën nëntë vota nga 15 anëtarët e Këshillit të Sigurimit, si dhe të shmangte veton e cilitdo prej pesë anëtarëve të përhershëm. Përveç SHBA-së, Rusisë dhe Kinës, të drejtën e vetos e kanë edhe Franca dhe Britania e Madhe.
