Çdo vit në Elbasan, rreth 600 çifte i japin fund martesës. Sipas statistikave të katër viteve të fundit, numri i divorceve është duke arritur këtë shifër mesatare çdo vit, pavarësisht se mes viteve mund të ketë më shumë ose më pak procedura.
Ndërkohë që shkaqet e divorcit kanë ndryshuar me kalimin e kohës, më herët problemet kryesore ishin dhuna, kriza ekonomike dhe emigrimi, tani ndikim po kanë edhe rrjetet sociale. Të dhënat tregojnë se rreth 80% e rasteve janë kërkesa të grave për ndarje nga bashkëshortët.
Pavarësisht se divorci ka humbur tashmë stigmën e dikurshme dhe konsiderohet si një zgjidhje, procesi mbetet i vështirë, sidomos për fëmijët. Shumë prindër nuk kanë njohuri të mjaftueshme për mënyrat e komunikimit të duhur me fëmijët e tyre gjatë kësaj periudhe, as për mundësinë e konsultimit me specialistë për t’iu ndihmuar të kalojnë këtë periudhë të vështirë.
