Kylian Mbappé dhe Ousmane Dembélé pritet të jenë të pranishëm në ceremoninë e Topit të Artë 2026, që zhvillohet të hënën në Londër.
Sipas “RMC Sport”, dy yjet francezë do të udhëtojnë drejt kryeqytetit britanik në orët e ardhshme. Mbappé fillimisht do të luajë El Clásicon me Real Madridin ndaj Barcelonës, përpara se të niset për në Londër.
Dembélé, fituesi i Topit të Artë në vitin e kaluar, nuk do të jetë në dispozicion të PSG-së për ndeshjen ndaj Lyonit për shkak të një dëmtimi, çka i mundëson të marrë pjesë në ceremoni.
Situata kujton atë të një viti më parë, kur PSG gjithashtu kishte një ndeshje pikërisht në mbrëmjen e ceremonisë së Topit të Artë. Edhe atëherë Dembélé ishte i dëmtuar dhe mundi të udhëtonte për të qenë i pranishëm në gala.
Pjesëmarrja e pjesës tjetër të delegacionit të PSG-së mbetet ende e paqartë. Khvicha Kvaratskhelia pritet t’i nënshtrohet një ndërhyrjeje kirurgjikale për dëmtimin në ligamentin e kryqëzuar të gjurit të djathtë, ndërsa Marquinhos nuk e ka konfirmuar praninë për shkak të një problemi në kofshë.
Edhe presidenti Nasser Al-Khelaïfi pritet të marrë një vendim në momentet e fundit.
Prania e Mbappé dhe Dembélé në Londër shton edhe më shumë interesin për ceremoninë, ndërsa gara për çmimin më prestigjioz individual të futbollit hyn në orët e fundit.
