Një 15-vjeçar është identifikuar dhe ndaluar nga policia, pasi dyshohet se më 15 tetor tentoi të vidhte duke thyer një bankomat në rrugën “Luigj Gurakuqi”, në Tiranë, gjatë protestës së ditës së tretë studentore.
Sipas policisë, vijojnë hetimet për identifikimin dhe ndalimin e personave të tjerë të përfshirë në ngjarje.
Njoftimi i policisë:
Tiranë/4 ditë më parë, tentoi të vidhte në një bankomat në rrugën “Luigj Gurakuqi”, identifikohet dhe ndalohet 15-vjeçari.
Në vijim të veprimeve intensive hetimore dhe operacionale, të kryera me qëllim identifikimin dhe nxjerrjen përpara përgjegjësisë penale, të autorëve të veprimeve të kundërligjshme, gjatë protestave të ditëve të fundit, specialistët e Sektorit për Hetimin e Krimeve të Rënda kundër Pronës ndaluan një 15-vjeçar.
I mituri dyshohet se është njëri nga autorët e thyerjes së një bankomati në rrugën “Luigj Gurakuqi”, më datë 15.10.2026, me qëllim vjedhjen.
Punohet për identifikimin dhe ndalimin e shtetasve të tjerë të përfshirë në këtë rast.
Materialet procedurale iu referuan Prokurorisë, për veprime të mëtejshme.
