Një automjet në pronësi të administratorit të njësisë administrative Shushicë është dëmtuar gjatë natës në fshatin Llakatund të Vlorës. Dyshohet se mjeti është dëmtuar nga shpërthimi i një lënde plasëse.
Ngjarja është regjistruar rreth orës 02:50, ndërsa automjeti i përket shtetasit I. B., 29 vjeç, banues në Shushicë, i cili mban detyrën e administratorit të kësaj njësie administrative. Mjeti ishte i parkuar pranë banesës së tij.
Policia bën me dije se grupi hetimor po punon për zbardhjen e plotë të rrethanave të ngjarjes, dokumentimin ligjor të saj, si dhe identifikimin dhe kapjen e autorit ose autorëve të dyshuar.
Deri më tani, nuk ka informacion zyrtar mbi motivet e mundshme të ngjarjes.
