Kryeministri Edi Rama ka vijuar akuzat lidhur me protestat e dhunshme në Tiranë, duke pretenduar se sulmet ndaj bankave dhe institucioneve nuk janë të rastësishme, por pjesë e një plani për të përhapur panik dhe për të nxitur qytetarët të dalin në rrugë. Rama solli në vëmendje edhe periudhën e humbjes së kursimeve të shqiptarëve, duke kritikuar organizatorët e protestave dhe figurat opozitare që, sipas tij, bëjnë thirrje për dhunë.
Ai deklaroi se në bulevard ndodhet vetëm një pjesë e studentëve, të cilët i cilësoi si të ndikuar nga grupe të maskuara, ndërsa akuzoi protestuesit se po përdorin edhe të mitur në përplasjet me policinë.
Në vijim, kreu i qeverisë përsëriti pretendimin se dy ditë më parë ishte neutralizuar një dron me eksploziv, i cili, sipas tij, kishte si objektiv goditjen e Kryeministrisë dhe shkaktimin e një zjarri në oborrin e saj. Rama e cilësoi këtë një plan që, sipas tij, nuk mund të jetë ideuar nga studentët, por që lidhet me një dorë të huaj. Këto pretendime për planifikimin e sulmeve dhe origjinën e tyre kërkojnë konfirmim të pavarur.
“Nuk u dogj asnjë biznes, nuk u turrën ata barbarë, tek bankat. Sepse Shqipëria sapo dilte nga një llahtar i humbjes së kursimeve të shqiptarëve. Nga ai matuf që bën thirrje për dhunë nga mëngjesi deri në darkë. Pse sulmohen sportelet e bankave? Është injoranca që thotë se shko se do gjesh lekë? Sulmohen sepse ky është plani, përhapja e panikut dhe ëndërr për të nxjerrë njerëzit në rrugë, për të gjetur para. Duan të ketë popull në rrugë, nuk ka popull. Një pjesë e popullit e mbështet. Ata që janë protagonistë në diasporë, janë personazhe të dështuara që udhëhiqnin fushatën e PD në diasporë.
Në bulevard janë një pjesë e vogël e studentëve, të verbuar nga ideja ekstremiste. Ata studentë janë pengje të grupit të zjarrit, po përdoren të miturit. Aty brenda është edhe krimi. Para dy ditësh është neutralizuar një dron me eksploziv, i destinuar për të goditur Kryeministrinë, duke i vënë zjarrin oborrit të brendshëm, një Zot e di çfarë pasojash, nuk ka të mitur që i shkon mendja ta vërë atë plan, që është një dorë e huaj”, theksoi ai.
