Lautaro Martinez ka rikthyer vëmendjen te periudha para Botërorit të Katarit 2022, duke kritikuar disa prej ish-shokëve të tij te Interi që, sipas kapitenit zikaltër, po mendonin më shumë për turneun me kombëtaret sesa për klubin.
Në një intervistë për faqen e Federatës Argjentinase të Futbollit, Lautaro nuk përmendi emra, por foli hapur për mënyrën se si e përjetoi atë periudhë.
“Në atë kohë kishte tre ose katër shokë te Interi që kishin probleme fizike dhe po mendonin më shumë për Botërorin sesa për klubin. Unë jam ndryshe. Jam besnik ndaj atyre që më hapin dyert dhe më trajtojnë në mënyrë të jashtëzakonshme.”
Argjentinasi theksoi se nuk kishte ndërmend të tërhiqej për të ruajtur veten për Katarin.
“Në atë moment ndjeva se nuk mund ta braktisja anijen dhe të largohesha nga klubi. Vazhdova të luaja. Nuk dua të humbas kurrë një ndeshje.”
Nga konteksti i sezonit 2022-23, tre emrat që lidhen më shumë me deklaratën e Lautaros janë Romelu Lukaku, Marcelo Brozovic dhe Denzel Dumfries.
Lukaku vuajti nga një dëmtim në kofshë që prej gushtit, u rikthye në tetor dhe më pas mbeti përsëri jashtë deri në Botëror. Brozovic gjithashtu pati probleme muskulore dhe nuk arriti të rikthehej plotësisht para turneut, ndërsa Dumfries pati një rol më të kufizuar në javët e fundit përpara nisjes drejt Katarit.
Lautaro foli gjithashtu për mënyrën se si menaxhoi problemet fizike përpara Botërorit të vitit 2026.
“Kisha një dëmtim në soleus që më mbajti jashtë për dy muaj. I thashë trajnerit se duhej të luaja. Duhej të shkoja në Amerikë me disa ndeshje në këmbë. Ishte një tjetër rrezik që vendosa ta merrja. Luajta për Interin deri në ndeshjen e fundit.”
Kapiteni i Interit foli edhe për humbjen në finalen e Botërorit.
“Kundër Anglisë dhamë në fushë edhe atë që nuk e kishim. Në finale kishte lojtarë që mezi ecnin, por vazhdonin të vraponin. Të humbasësh kështu dhemb. Dhemb dyfish. Të lë një plagë të madhe.”
