Një 24-vjeçar është arrestuar në Tiranë, pasi në banesën e tij u zbuluan 344 kuti me lëndë piroteknike të dyshuara si të kontrabanduara, me vlerë rreth 40 mijë euro. Sipas Policisë, dyshohet se ato do t’u shiteshin personave të përfshirë në protestat e zhvilluara gjatë tri ditëve të fundit.
Në pranga ka rënë shtetasi me inicialet E. R., 24 vjeç. Gjatë kontrollit në katin e parë të banesës së tij, në rrugën “Jargavani”, uniformat blu gjetën dhe sekuestruan 344 kuti me lëndë piroteknike të llojeve të ndryshme.
Sipas hetimeve paraprake, ekziston dyshimi se 24-vjeçari ua furnizonte këto lëndë personave të maskuar dhe të përfshirë në akte dhune gjatë protestave të ditëve të fundit.
Ndërkohë, Policia po vijon kontrollet dhe hetimet për identifikimin e personave të tjerë që mund të jenë të përfshirë në këtë veprimtari të paligjshme, si dhe për dokumentimin e plotë të rastit.
Materialet procedurale i janë referuar Prokurorisë së Tiranës për veprime të mëtejshme.
