Prokuroria e Korçës ka regjistruar dhe nisur një hetim për vdekjen e 12-vjeçarit Leo Sadiku, i cili humbi jetën pas trajtimit mjekësor në spitalin e Qendrës Spitalore Universitare “Nënë Tereza”.
Por tashmë i njëjti institucion që nisi hetimin pas kallëzimit të prindërve ndaj mjekëve, ka shpallur moskopetencë. Shkak është fakti që vdekja ndodhi në QSUT, dhe çështja do të kalojë për hetim në Prokurorinë e Tiranës.
Familja e të miturit ka denoncuar mjekët e Korçës dhe Tiranës për neglizhencë, duke akuzuar ata se shkaktuan vdekjen e djalit të tyre. Nëna e 12-vjeçarit, Roveta Sadiku, kërkon drejtësi, duke fajësuar mjekët për trajtimin e gabuar që çoi në humbjen e jetës së të birit.
Ngjarja e rëndë ndodhi më 8 janar, kur Leo Sadiku ndërroi jetë në Spitalin Universitar “Nënë Tereza”, pas një dyshimi për arrest kardiak si shkak të vdekjes.
