Përplasja ligjore mes Juventusit dhe Cristiano Ronaldos vazhdon edhe pas disa vitesh, me klubin bardhezi që ka vendosur ta çojë çështjen deri në Gjykatën e Kasacionit.
Bëhet fjalë për pagat e papaguara që lidhen me periudhën e pandemisë dhe të ashtuquajturën “manovër pagash” të Juventusit.
Në prill të vitit 2024, një panel arbitrazhi vendosi që Cristiano Ronaldo të përfitonte 9.8 milionë euro, plus interesa dhe rivlerësim. Shuma përfaqësonte gjysmën e rreth 19.6 milionë eurove që portugezi pretendonte se i detyroheshin.
Juventusi e kundërshtoi vendimin, por në janar Gjykata e Torinos rrëzoi ankimimin e klubit. Tashmë bardhezinjtë kanë kaluar në shkallën e tretë të gjykimit, duke paraqitur rekurs në Gjykatën e Kasacionit.
Origjina e çështjes lidhet me periudhën e Covid-19. Në vitin 2021, drejtuesit e Juventusit kishin arritur një marrëveshje për shtyrjen e pagesës së rreth 19.5 milionë eurove të pagës bruto të Ronaldos. Dokumenti u bë më pas i njohur si “Carta Ronaldo”.
Shuma nuk u pagua pasi Ronaldo u transferua te Manchester United gjatë verës së vitit 2021, ndërsa dokumenti u bë pjesë edhe e hetimit “Prisma” ndaj drejtuesve të Juventusit.
Cristiano Ronaldo e paditi klubin në shtator të vitit 2023. Për shkak se dokumenti nuk mbante firmën e tij, çështja kaloi në arbitrazh, ku u vendos që portugezi të merrte gjysmën e shumës së pretenduar.
Juventusi sqaron se efektet financiare të këtij vendimi janë reflektuar tashmë në bilancet e klubit dhe se nuk priten pasoja të reja ekonomike në llogaritë aktuale apo të ardhshme.
Tashmë pritet caktimi i datës së seancës në Gjykatën e Kasacionit, ndërsa përplasja mes Juventusit dhe Ronaldos mbetet ende e hapur.
